Súkkulaði jólasveinahúfur

Í dag var jólaball í leikskólanum hans Nikulásar og allir foreldrar voru beðnir um að koma með eitthvað á hlaðborðið, smákökur, kökur eða ávexti.

Ég sá þessa hugmynd á Pinterest, ótrúlega einfalt og útkoman eru skemmtilegar jólasveinahúfur :)

Nikulás hjálpaði mér að baka

Afmæliskaka

Bakaði þessa afmælisköku um daginn fyrir litla frænku sem er reyndar ekkert lítil lengur, næstum því jafn stór og ég og orðin 12 ára gömul.

Misheppnaðist aðeins massinn hjá mér hann var ekki alveg nógu þykkur og ég hefði mátt þjappa aðeins betur á munstursmottuna til að fá greinilegra blómamynstrið, ég var svo hrædd um að massinn myndi festast á mottunni en well kakan var ekkert verri fyrir vikið :)

Ég litaði hvítan sykurmassa í tveimur bleikum litum, bjó til 80 blóm, setti eitt blóm inn í annað og hvíta perlu í miðjuna. Smá dúllerí að gera stafinu, massinn vildi helst festast en eftir að ég skellti stafamótinu í kartöflumjöl og sló síðan af því, gekk þetta ágætlega.

Og auðvitað eins og vanalega gleymdi ég að taka mynd eftir að kakan var skorin en innihaldið er súkkulaði hindberja kaka með bleiku smjörkremi, ótrúlega fersk og góð. Ég meir að segja borðaði hana en mér finnst súkkulaðikökur ekkert sérstaklega góðar :)

Afmælisveisla Kára - 6 ára

Kakan neðst er regnbogakaka en ég klikkaði á því að taka mynd eftir að búið var að skera fyrstu sneiðina, þetta eru 6 botnar sem ég setti saman, ansi há og með rjómaostakremi utaná.

Ég man ekki alveg hvaðan ég fékk uppskriftina en hún fylgir hér fyrir neðan, á miðju myndinni eru brownies með geim myndum sem ég fann á netinu, prentaði út, gataði og límdi tanstöngla aftan á. Myndin efst segir sig sjálft.

Regnbogakaka

2 og 1/4 bolli hveiti
1 tsk lyftiduft
1/2 tsk salt
1 og 1/4 bolli mjólk
4 stór egg
1 bolli sykur
2 tsk  rifinn sítrónubörkur
8 matskeiðar mjúkt smjör
1/2 teskeið sítrónudropar
Matarlitur

Aðferð

Hitið ofninn í 180 gráður.

Berið smjör inn í tvö kringlótt meðalstór kökumót. Sigtið saman hveiti, lyftiduft og salt. Hrærið saman eggjahvítur og mjólk í annarri skál. Hrærið saman smjör, sítrónubörk og sykur í hrærivél á fullum hraða í um 3 mínútur eða þar til blandan er orðin létt og loftkennd. Bætið sítrónudropunum samanvið. Hrærið hveitiblönduna smátt og smátt saman við þetta til skiptis við eggja- og mjólkurblönduna. Hrærið blönduna á meðalhraða í um 2 mínútur eða þar til deigið er orðið vel blandað.

Ákveðið hvað á að hafa mörg lög af litum. Skiptið deiginu upp í hluta eftir því hvað þið viljið hafa marga liti. Litið hvern hluta af deigi með sínum lit. Ég nota matarliti frá Wilton, en þeir fást í bökunardeildinni í Húsasmiðjunni/Blómaval. Það eru litir úr geli og þarf mjög lítið af þeim til að ná fram sterkum lit. Ef þið ætlið að notast við Wilton matarlit byrjið þá á því að dýfa tannstöngli ofan í matarlitinn og hræra svo tannstönglinum samanvið deigið. Endurtakið ef þið viljið fá sterkari lit. Bakið hverja litaða deigblöndu fyrir sig í ca. 20 mínútur. Leyfið kökunni að kólna. Til þess að kakan haldi raka er best að setja plastfilmu yfir kökuna um leið og hún hefur kólnað nægilega vel og geyma á  köldum stað. 

Frostingkrem 

600 gr rjómaostur
15 tsk mjúkt smjör
6 tsk vanilludropar
6 bollar flórsykur

Hrærið rjómaostinn þar til hann er orðinn mjúkur, bætið því næst við smjörinu og vanilludropunum. Bætið flórsykrinum smám saman við blönduna og hrærið vel.

Að setja kökuna saman

Leggið fjólubláa kökubotninn á kökudisk. Smyrjið þunnu lagi af apríkósusultu á kökubotninn og smyrjið svo þunnu lagi af stífþeyttum rjóma þar ofan á. Leggið bláa kökubotninn ofan á. Smyrjið þann botn aftur með apríkósusultu og svo þar yfir með frostingkreminu. Endurtakið leikinn með þá kökubotna sem eftir eru og skiptist á að smyrja með þeyttum rjóma og frostingkremi á milli laga. Til þess að kakan tolli betur saman er gott að kæla hana inn á milli. Þegar öll lögin eru komin má smyrja kökuna að utan með örþunnu lagi af frostingkremi og setjið í kæli í 20 mínútur. Að lokum má taka kökuna úr kæli og smyrja hana að utan með þykkara lagi af frosting kremi og dreifa kókosmjöli yfir kökuna. 

Vanillu hindberjabollakökur

Þessa uppskrift fann ég í einhverju Gestgjafa blaði, ein af mínum uppáhalds, svo ferskar og góðar.

Hér er uppskriftin:

100 gr smjör, mjúkt
140 gr sykur
2 egg, stór
240 gr hveiti
1 tsk lyftiduft
1/4 tsk salt
1 jógúrt (með eða án bragðefna)
1 tsk vanilludropar

250 gr jarðarber eða önnur ber
3 msk pistasíur eða hesilhnetur
2-3 msk sykur

Hitið ofninn í 180°

Hrærið saman smjör og sykur þar til blandan er létt og loftkennd. Bætið eggjum út í, einu í einu, og hrærið mjög vel saman.
Sigtið hveiti og lyftiduft saman og bætið út í, ásamt jógúrt og vanilludropum. Blandið öllu saman með sleikju. Setjið deigið í múffuform og stingið berjum í deigið og sáldrið sykri og hnetum ofan á. Bakið kökurnar í miðjum ofni í 15 mín eða þangað til þær eru gullinbrúnar. Múffurnar eru bestar nýbakaðar en má gjarnan frysta :)

Bollakökur fyrir afmæli Arons Fannars

Gulrótarbollakökur og Súkkulaði hindberja bollakökur með sykurmassaskreytingu sem ég man ekki lengur hvað átti að vera :)

Hreindýrabollakökur með Moniku

Litla frænkuskottið mitt bað mig um að baka með sér fyrir kökukeppni í skólanum, hún vildi baka bollakökur með lituðum sykurpúðum og jólalegar, útkoman var hreindýrið Rúdólf.

Hér er uppskriftin:

70 gr sykur

70 gr púðursykur

60 gr smjörlíki/smjör við stofuhita

1 egg

130 gr hveiti

1/4 tsk salt

1/2 tsk matarsódi

1/2 tsk lyftiduft

20 gr kakó

1 dl mjólk

Aðferð:

Hitið ofninn í 180
Þeytið smjör, sykur og púðursykur vel saman og svo egginu.

Bætið svo restinni af innihaldinu útí og hrærið saman, setjið í form og bakið í miðjum ofni á 10-12 mín.

Krem:
250 gr flórsykur
40 gr smjör brætt
40 gr kakó
1 tsk vanilludropar
1 stk egg
heitt vatn ef það þarf að þynna kremið aðeins.

Meðan kökurnar voru enn volgar, tókum við aðeins úr miðjunni og fylltum með litríkum litlum sykurpúðum sem við keyptum í Kosti.
Keypti rauðgyllt form í Allt í köku. Trýnið bökuðum við sjálfar og skárum út með hring móti, skreyttum með saltkringu, rauðri m&m kúlu, augun eru úr sykurmassa og augasteinninn með svörtum matartúss.

Vinaleikur í desember

Kakó í krús, með sykurpúðum.

Keypti krukkuna í Europris, borðann í Föndru og leiðbeiningarnar ofan á prentaði ég á skrapp pappír.

Innihaldið er blandað við egg, smjör og vanilludropa og útkoman eru litríkar smákökur

1 1/3 bolli hveiti
1 tsk lyftiduft
1 tsk matarsódi
1/4 tsk salt
1 bolli haframjöl
3/4 bolli m&m
3/4 bolli súkkulaði dropar
1/2 bolli púðursykur
1/2 bolli sykur
1/3 – 1/2 bolli saxaðar pecan hnetur
Blandar hveiti lyftiduft og matarsóda létt saman og setur í þeirri röð eins og hér fyrir ofan.
Við þetta blandast
1 bolli alveg mjúkt smjör
1 egg
1 tsk vanilludropar
Bakast við 180° í 10 min.

Gulrótarbollakaka, bjó til gulrótina úr sykurmasssa

Gullrótarbollakaka, bjó til sykurmassa og litaði og mótaði svo með höndunum.

Nikulás 1 árs !

Ég ákvað með mjög stuttum fyrirvara hönnunina á eins árs afmælisköku Nikulásar. Ég var búin að æfa mig eins og vindurinn að gera alls konar bollakökur eins og sjá má hér á blogginu. En einhverra hluta vegna ákvað ég að henda mér í djúpu laugina og búa til sykurmassa og sykurmassaskreytingar.

Uppskriftin af kökunni sjálfri fékk ég á vef mommur.is
Beljuþemað er mjög táknrænt fyrir mig og Nikulás því hann neitar að hætta á brjósti. Ég er s.s stærri og breiðari beljan og hann litli kálfurinn. Það var ekki pláss fyrir mig á kökunni þannig að Nikulás litli kálfurinn minn fékk nóg pláss.

Ég keypti ýmislegt í Allt í köku og Kosti til að gera sykurmassa skreytingarnar en grasið gerði ég með smjörkremi.

Negrakossa Kóngulær

Keypti 12 negrakossa niðrí Nettó á 200 kr, jább 200 kr, stakk apollo lakkrísreimum í hliðarnar og augun keypti ég í Kosti en í staðinn er hægt að nota hvíta súkkulaðidropa og teikna augasteininn með matarlit.

Á neðstu myndinni eru vanillubollakökur, bjó til föndrið úr skrapp pappír sem ég keypti í Garðheimum og gataði með sérstökum gatara og límdi svo tannstöngla aftan á og stakk í bollakökurnar :)

Skírn Sigurðar Einars

Vanillubollakökur með tvílituðu kremi og Fröken Reykjavík 2011

Súkkulaði hindberjabollakökur með hindberjakremi til heiðurs bleiku slaufunnar

Súkkulaði hindberja bollakökur

125 gr smjörlíki

125 gr púðursykur

2 egg

125 hveiti

1 tsk lyftiduft

1/2 tsk matarsódi

1/4 tsk salt

3 msk kakó (t.d. Cadbury’s)

1 dolla af hindberjajógúrt

Frosin hindber, mulin

Aðferð

Hitið ofnin í 180°.

Þeytið smjörlíkið saman við púðursykurinn og svo eggin, eitt í einu.

Blandið þurrefnunum saman við og strax á eftir jógúrtinu.

Þeytið í ca 1-2 mín eða þangað til allt er vel blandað, setjið svo í form og bakið ca 25 mín.

Krem

80 gr smjörlíki

2,5 dl flórsykur

1/3 bolli hindber

1 tsk vanilludropar

smá dash af ferskum sítrónusafa gerir punktinn yfir i-ið.

Fröken Reykjavík 2011

Þessi uppskrift frá Thelmu Þorbergsdóttir vann bollakökukepnina "Fröken Reykjavík 2011"

Kanilbomba

Hráefni
125 gr smjör við stofuhita
200 g sykur
170 gr hveiti
1 tsk vanilludropar
2 stór egg
2 tsk lyftiduft
Smá dass af salti
120 ml mjólk
1 cup púðursykur (dökkbrúni) blandað með 1.5 tsk kanil, þetta er hrært saman.
(ef þú vilt hafa kökuna extra blauta er gott að setja vanillubúðing bara innihaldið í pakkanum út í kökudeigið kannski 1/2 pakka)

Þeir sem vilja fara einfalda leið þá er hægt að kaupa yellow cake mix og blanda það saman við
3 egg
1 cup vatn
126gr smjör brætt

Ofninn hitaður í 180 gráður

Hrærið saman sykrinum og smjörinu vel saman bætið svo eggjunum saman við og hrærið vel þangað til blandan verður mjúk og fín. Blandið hveiti, lyftidufti og salti saman í skál og hrærið saman við, bæti því saman við ásamt mjólkinni, vanilludropunum smá og smá í einu og hræra vel á milli. Hrærið svo á miklum hraða í ca. 2 mín.
Setjið deigið í ca 1/4 af muffins forminu. Setjið svo 1 tsk af kanil/púðursykrinum ofan í og setjið svo aðra skeið af deiginu yfir, setjið aftur 1 tsk af kanil/púðursykri yfir (reyndu að fylla muffins mótið ekki meira en 2/3) takið hníf og hringsnúið honum í gegnum deigið til þess að blanda saman deiginu og kanil/púðursykrinum.

Bakið í ca 15 mín. Kælið.

Krem
(ef þú vilt hafa mikið krem gerið þá tvöfalt)
225 gr rjómaostur, mjúkur
125gr smjör, við stofuhita best að hafa það aðeins mjúkt
1 tsk vanilludropar
3 cups flórsykur

Blandið saman rjómaostinum, smjöri og vanilludropum þangað til það er orðið mjúkt og fínt. Setjið því næst flórsykur, hafið hrærivélina stillta á litlum hraða og bætið smá og smá út í, hrærið vel á milli. Skafið hliðarnar úr hrærivélinni vel og hrærið á miklum hraða í ca 2 mín.
Setjið kremið á cupcakes og setjið inn í ísskáp þangað til
kanil/púðursykurgljáinn er tilbúinn.

Gljái:
125gr smjör
1cup púðursykur
1.5 tsk kanill
Setjið smjörið, púðursykurinn og kanilinn í lítinn pott yfir meðal hita og bræðið saman. Passið að má ekki fara að sjóða upp á blöndunni. Setjið 1 tsk eða eins og þú vilt yfir cupcakes og setjið strax inn í ísskáp þangað til gljáinn hefur náð að storkna. 

Bláberjabollakökur með smjörkremi bragðbætt með cheese cake bragði

Sama uppskrift og Bláberjabollakökur, en þarna bjó ég til smjörkrem og bragðbætti með cheese cake bragði, kom ágætlega út.

Gulrótarbollakökur með rjómaostakremi

Gulrótarbollakökur, mjúkar og bragðgóðar (12 stk).

1 og ¼ bolli hveiti

1 tsk lyftiduft

1 tsk matarsódi

1 tsk kanill

Pínu múskat                

½ tsk salt                                           

2 egg                                                 

100 ml olía

½ bolli sykur

½ bolli púðursykur

1 tsk vanilludropar

Sítrónubörkur, saxaður smátt

1 ½ bolli gulrætur

Hitið ofninn í 170°. 

Setjið öll þurrefni saman í skál. Þeytið saman egg, olíu sykur og vanilludropum. Hrærið út í gulrótum og sítrónuberki með sleif. Setjið í muffisform og bakið í cirka 16-18 mínútur.

Rjómaostakrem

225 gr rjómaostur

125 gr ósaltað smjör

2 tsk vanilludropar

400 gr flórsykur

Bláberjabollakökur með sætum bláberjarjóma og bleikum súkkulaði hjörtum

Uppskrift: 

115 gr smjör 

1 1/4 bolli sykur 

2 egg 

2 bollar hveiti

1 tsk salt 

2 tsk lyftiduft 

1/2 bolli mjólk

1/2 - 1 tsk vanilludropar

2 bollar bláber (frosin eða fersk) 

Aðferð:

Þeytið smjör og sykur saman þar til blandan lýsist, bætið eggjunum útí einu og einu og hrærið vel á milli. Þeytið þessu vel saman þangað til ykkur finnst blandan orðin loftmikil og ljós.

Bætið þurrefnum + mjólk útí og hrærið þar til það er blandað. Engin ástæða er að hræra kökudeig lengur en bara til að það blandist vel saman.

Bakið í ofni við 180°C í 30-40 mínútur. Mínar muffins voru inni í 42 mínútur en séu notuð fersk, ófrosin ber þá mun bökunartíminn vera styttri.

Rjómi

2 dl rjómi

15 gr sykur

¼ tsk vanilludropar 

Vanillubollakökur

Notaði sömu uppskrift og í vanillubollakökur, nema hér bætti ég við appelsínugulum og túrkís súkkulaðidropum frá Wilton sem ég skar í fernt, setti smá "super white" í kremið til að fá það hvítara og litríkar súkkulaði flögur ofaná.

Bleikir kökupinnar

Nú ákvað ég að prófa sjálf frá grunni, ég bakaði grænu kökuna en að sjálfsögðu með rauðum matarlit og útkoman var bleik kaka. Ég lét hana kólna og reif hana svo niður í skál og blandaði vanillu kremi útí. Mótaði kúlur og skellti í frysti í ca 10-15 mín. Bræddi dökkan súkkulaðihjúp, keypti pinnana í Allt í köku og skrautið fékk ég í Partýbúðinni.

Hér er uppskriftin:

250 gr smjörlíki
250 gr hveiti
250 gr sykur
2 egg
1 tsk lyftiduft
1 tsk möndludropar
1 1/2 dl sjóðandi vatn
rauður matarlitur

Hrærið saman smjörlíki,sykur og svo eggjum. Bætið við möndudropum og matarlit, svo helming af hveiti og helming af vatni og í lokin blandið saman rest af hveiti og lyftiduft og bæta því við ásamt restinni af vatninu.

Bakið í 160° í ca 50 mín.

Vanillubollakökur með þrílituðu smjörkremi

Ég keypti mót fyrir 24 bollakökur í Allt í köku, ætlaði að vera voða sniðug og baka allar í einni plötu.

Þegar ég kom heim og búin að rífa plastið af þá kom í ljós að formin pössuðu ekki í mótin.

Well ég bakaði þær í mótinu og færði yfir í formin.

Ég notaði gel matarliti í smjörkremið frá AmeriColor.

Hér er uppskriftin:

Vanillubollakökur með þrílituðu smjörkremi (12 stk)

125 gr smjörlíki (mjúkt)

125 gr sykur

2 egg

145 gr hveiti 

1/4 tsk matarsódi

1 og 1/4 tsk lyftiduft

hnífsoddur salt

1 tsk vanilludropar

50 gr hvítir súkkulaðidropa

Smjörkrem:

80 gr smjörlíki

2,5 dl flórsykur

(1 msk vatn)

1 tsk vanilludropar

Fyrstu kökupinnarnir sem ég bjó til fyrir afmæli Katrínar

Ég man ekki alveg hver kveikjan var að kökupinnargerð, sennilega bara það að mig langaði að gera eitthvað annað en að baka "köku".

Uppskriftin er einföld:

1 Betty Crocker Djöflaköku- eða súkkulaðikökumix

400 g súkklaðikrem frá Betty Crocker

Hvítir súkkulaðidropar frá Nóa Síríus

Aðferð

Bakið Betty Crocker blönduna samkvæmt leiðbeiningum. Þegar kakan er orðin köld er hún tekin í sundur og mulin niður í skál. Kreminu er síðan bætt saman við með gaffli. Besta útkoman verður þegar blandan er kramin í höndunum, nauðsynlegt að vera í hönskum. Blandan á að vera þannig að hún festist ekki við hendurnar og ekki of þurr.  Ef farið er nákvæmlega eftir uppskriftinni ætti hún að vera fullkomin.

1. Mótið kúlur, setjið á smjörpappír og kælið í kæli í ca. 15-30 mínútur eða í frysti í 5 mínútur.

2. Kúlurnar eru teknar út, endanum á kökupinna dýft í súkkulaði og stungið í miðjuna á kúlunni. Kælið aftur þar til súkkulaðið á pinnanum er storknað.

3. Súkkulaði er brætt við meðalhita, litað með súkkulaðilitum og síðan notað til að hjúpa pinnana.

4. Skreytið að vild.