Nokkrar Kríur í viðbót

Nokkrar Kríur sem ég heklaði fyrir jólin, allar úr Kunstgarni á nál nr. 4,5 og 5.

Jóladagatal

Ég ákvað að búa til dagatal fyrir Nikulás því mér fannst ekkert henta honum af því sem var í boði í verslunum, en hugmyndina fékk ég á Pinterest.

Hann er með svo mikla sjóræningjadellu, byrjaði fyrst með Söngvaborg í kringum eins árs aldurinn en þá var hann svo sjúklega hræddur við eitt lagið sem sjóræningi syngur.

Í dag er hann bara pínu hræddur við sjóræningja en á móti mjög spenntur fyrir þeim. Ég fann fullkomið dót í Hagkaup til að fylla í hólfin en sumir kallarnir eru aðeins of stórir og sums staðar sést í smá sverð sem skiptir hann örugglega engu máli. Svo keypti ég blöðrur og smá hlaup og fann fullkominn stað fyrir dagatalið en það fékk ekki lengi að hanga þar í friði og er komið inní eldhús uppí hillu þar sem litlir fingur ná ekki í :)

Súkkulaði jólasveinahúfur

Í dag var jólaball í leikskólanum hans Nikulásar og allir foreldrar voru beðnir um að koma með eitthvað á hlaðborðið, smákökur, kökur eða ávexti.

Ég sá þessa hugmynd á Pinterest, ótrúlega einfalt og útkoman eru skemmtilegar jólasveinahúfur :)

Nikulás hjálpaði mér að baka

Vinkonu afmælismatarboðið 15.september

 Grillaðar kjúklingalundir með Coriandercoco sósu

 Ég pantaði sushi-ið hjá Tokyo sushi en laxatartarinn bjó ég til sjálf

 Steikarsalat, sama og þetta en ég prófaði í fyrsta skipti að nota Flank steik sem ég keypti í kjötverslun

 Ég bakaði Funfetti köku, notaði hringamót til að skera út og setti þær í barnamatarkrukkur og ofan á fór mars- og hindberjakrem. Auðvitað föndraði ég sjálf allt skrautið :)

 Vantar tvær vinkonur á myndirnir sem komu aðeins seinna og gleymdist að taka mynd af :/

Kjúklingur- Chorizo

Ég eldaði súper einfaldan en súper ljúffengan kjúklingarétt fyrir fjölskylduna í kvöld.

Ég setti kjúklingalæri í ofnskúffu, skar kartöflur í fernt og stráði yfir kjúklinginn. Svo fór dash af olíu og ég nuddaði bitana og kartöflurnar, skar niður rauðlauk gróft og chorizo pyslu í sneiðar og svo í fernt og stráði yfir. Að lokum kryddaði ég með salti, pipar, oreganó og rifnum appelsínubörk og skellti inní ofn á 180 gráðir í klukkutíma.

Dásamlega gott :)

Fyrsta Krían mín :)

Ég er í hópnum Handóðir heklarar á Facebook og þar gengur yfir algjört Kríu æði. Ég er svo áhrifagjörn og nýbúin að vera í samhekli þannig að ég gat ekki annað en að smitast af þessari dásemd. En uppskriftina má finna í Þóru - heklbók.

Nýtt garn var að lenda í garnversluninni Handprjón, garn sem tók 2 ár að fá að gerast viðskiptavinir og 6 mánuða bið eftir fyrstu sendingu. Geggjað merino ullar garn sem var alveg tilvalið fyrir Kríuna mína, garnið heitir Madelinetosh en ég keypti einnig dokku af gráu Abuelita - Merino Lace til að hafa það röndótt :)

Ég keypti garnið á mánudaginn og byrjaði að hekla úr því um kvöldið en eftir cirka 3 umferðir festist garnið þannig að ég losaði aðeins úr miðjunni. Fljótlega festist það aftur og ég losaði aðeins meir úr miðjunni og svo festist það aftur og þá reyndi ég að ýta því út hinu megin og þá var skaðinn skeður, þvílíka flækjan, OMG !

Ég klippti á garnið og notaði endann sem lá utan á dokkunni og hélt áfram að hekla en það truflaði mig samt mikið að sjá þessa lausu garnaflækjuklessu í miðjunni.

Ég brunaði inní Hafnarfjörð í Handprjón daginn eftir í hádeginu og það tók okkur Ernu, starfsmann Handprjón um klukkutíma að byrjað að leysa flækjuna og auðvitað þurfti ég að rekja upp það sem ég var byrjuð á, ég varð síðan að bruna aftur í vinnuna en fór aftur eftir vinnu inní Hafnarfjörð og hélt áfram ásamt Ernu.

Vorum 2 tíma að leysa flækjuna og ég verð að viðurkenna að á tímabili var ég við það að henda garn flækjunni og kaupa mér nýtt. En það var vegna þolinmæði Ernu að við kláruðum að leysa 380 metra flækju.

Ótrúlega stolt af mér að halda þetta út og þakklát Ernu fyrir hjálpina ! :)

Fyrsta heklaða sjal/klútur :)

Núna þegar fer að kólna er svo notalegt að vera með eitthvað hlýtt um hálsinn. Ég féll fyrir þessu sjali fyrir löngu síðan á blogginu hennar Elínar, keypti mér garnið 7 bræður niðrí Handprjón síðasta mánudag og kláraði að hekla sjalið/klútinn í gær. Fljótlegt og fallegt :)

Nikulás 2 ára :)

Það er svo gaman þegar mikið er að gera og allt gengur upp !
En fyrir utan að undirbúa afmælisveisluna þá var ég einnig að undirbúa búningakeilu fyrir vinnuna og svo auðvitað að sinna fjölskyldunni og heimilisstörfum.

En þetta gekk allt saman vel og okkur finnst ótrúlegt að litli gullmollinn okkar skuli vera orðinn 2 ára, skil ekkert hvað varð af þessum tíma :)

Hér fyrir neðan koma myndir af veitingum og ein af afmælisbarninu.

Ég keypti myndina...

Bakaði tvo botna úr kökumixi og bjó til smjörkrem sem ég setti á milli og utan um kökuna

Uglu bollakökurnar bjó ég til úr Oreo kexi, m&m og Ganache kremi

Tengdamamma bjó til þessa köku, svokölluð „græna kakan“ sem er græn möndlukaka með súkkulaðikremi

Svo bjó ég til þessar keilur og fyllti með nammi og pakkaði frauðplasti inn og festi með grillpinnum sem ég klippti til.

Einnig sést glitta í svínaloku en brauðin sem við bökuðum voru heldur stór og þétt þannig að við settum eingöngu á helminginn, hægeldaður svínahnakki í bbq með bleiku salati og kálblaði.

Það sést líka aðeins í gulrótrkökuna en ég hef ekki hugmynd af hverju ég bjó ekki til bollakökur úr deiginu, þetta var ekki alveg ég að baka í ferköntuðu móti og skera í ferninga :/

Svo voru einnig heitir réttir, og pizzasnúðar og skinkuhorn sem við bökuðum að sjálfsögðu sjálf :)

Ég held að ég get alveg sagt fyrir hönd Nikulásar að hann hafi verið ánægður með afmælið sitt. Ég hef sjaldan séð hann hlægja jafn hátt og skemmta sér vel !

Sunnudagslærið

Eitt af því sem ég elska við haustin eru nýslátruðu lömbin og verða þau því oft fyrir valinu hjá okkur á sunnudögum. Í gær fórum við í seinna fallinu að versla því húsmóðirin gat ekki hætt að hekla... ;)

Nikulás litli sofnaði í bílnum rétt áður en við ætluðum í heimsókn og þess vegna brunuðum við heim og ég stökk inn og kryddaði lambið meðan Nikulás svaf og auðvitað var pabbinn hjá honum á meðan.

Ég skar niður tvo lauka, gulrætur, sellerí og hvítlauk og setti í botninn á pottinum. Skar djúpar raufar í lærið og stakk hvítlauk sem ég var búin að skera gróft niður. Því næst nuddaði ég lambið vel með góðri olíu, kryddaði með salti, sítrónupipar, rósarpipar og bezt á lambið. Svo fékk lærið að dúsa í pottinum með lokinu á eldhúsborðinu í tvo tíma meðan við skruppum í heimsókn.

Þegar við komum heim tók á móti okkur unaðsleg lykt sem sveimaði um alla íbúðina.

Ég byrja alltaf á því að loka kjöti og skellti því inn í 200° heitan ofn í 20 mín, svo lækkaði ég hitann niðrí 150° og lærið (2,6 kg) fékk að dúsa áfram í 80 mín.

Ég á því miður ekki fleiri myndir, vorum orðin svo svöng, þessi verður bara að duga !

Með þessu bar ég fram grófar, stórar franskar, gular baunir, rauðbeður, grænmeti úr pottinum, ferskt salat og 1 líter af brúnni sósu, ég notaði soðið úr pottinum ásamt helmingnum af grænmetinu sem ég skellti í matvinnsluvél, það er einnig hægt að nota töfrasprota.

Það er nógur afgangur fyrir kvöldið í kvöld, allt úthugsað svo húsmóðirin geti heklað með CAL hópnum sínum eftir vinnu í dag ;)

CAL - Crochet A Long (Samhekl)

Ég ákvað að vera með í Samhekli eftir að hafa fylgst með stelpunum í hópnum setja inn myndir af garninu sem þær völdu. 

Ástæðan fyrir því að ég stökk ekki strax til var sú, að á sama tíma var ég að vesenast með annað teppi sem mig langaði að hekla og auðvitað keypti ég garn í bæði teppin :)

CAL – samheklið lýsir sér þannig að hópurinn heklar sama teppið Vintage CrochetedThrow & Afghan og svo getum við rætt saman, hist eða deilt myndum.

Ég  valdi Léttlopann og haustlitina í teppið mitt, keypti 21 dokku, 3 í hverjum lit. Dauðlangaði í Cascade 220 garnið úr Handprjón og ég varð að bíta mig fast í handarbakið til að stoppa mig af.

Ég byrjaði að hekla á mánudagskvöldinu og staðan var þessi næsta dag um 16-leytið. Um kvöldið náði ég að hekla 5 umferðir og í gærkvöldi 7. Samkvæmt uppskrift eru 65 umferðir en ég reikna með að bæta við það. Eftir að hafa reiknað gróflega afköstin næstu daga þá ætti ég að vera búin með 60 umferðir á sunnudaginn  :) 

Ég heklaði ekki nema 4 umferðir í kvöld og þá er ég búin með alls 31 umferð, þetta mjakast..

Nikulás kom sér vel fyrir undir teppinu þegar ég ætlaði að taka mynd :)

21.10 - Búin með 60 umferðir og nú á ég bara 20 umferðir eftir :)

TILBÚIÐ ! Tók viku að hekla teppið og stærðin er 100 x 130 :)

Bolognese

Það finnst öllum á mínu heimili Spaghettí Bolognese gott og sérstaklega honum Nikulási, það var tímabil þegar hann borðaði fátt annað og þá bjó ég til baby-version og frysti. Hér fyrir neðan er aðferðin mín :)

Ég byrja á því að steikja rauðlauk og gulrætur í smá olíu og stundum annað grænmeti sem til er í ísskápnum. Í þetta skiptið bætti ég við blaðlauk og grænni papríku.
Bjó til pláss í miðjunni og steikti hakkið og blanda svo öllu saman. Hendi útí oreganó og basil og steiki aðeins saman.

Svo fer tómatmaukið útí og ég hita það og blanda síðan við hakkblönduna.

Eftir það fer hvítlaukurinn útí og ég steiki aðeins saman.

 Bý til pláss í miðjunni fyrir rauðvínið og Worcestershire  og blanda svo saman.

 Svo fara tómatarnir útí...

 Og í lokin mjólkin og svo leyfi ég þessu að malla í hálftíma og krydda með salti og pipar.

Borið fram með spaghettí, hvítlauksbrauði og nýrifnum parmesan.

Innihald:

1 stór rauðlaukur

5-6 rifnar gulrætur

1 kg nautahakk

1-2 msk þurrkað oreganó

1-2 msk þurrkað basil

1 dós (6 ounce) tomato paste

6 hvítlauksrif

1 bolli rauðvín

2 msk Worcestershire sauce

2 dósir (28 ounce) Whole Tomatoes

1 bolli mjólk

Salt & Pipar

Tröppustóll fær nýtt líf !

Gömlu eldhússtólarnir voru orðnir svooo þreyttir og ég veit ekki hversu oft ég hef þurft að stíga á þá til að komast uppí efstu skápana í eldhúsinu. Við fengum okkur nýja eldhússtóla um daginn og ég var alveg ákveðin í því að ég myndi ekki nota þá til að stíga á. Ég keypti mér Bekvam tröppustól í Ikea og gaf honum nýtt líf !

Keypti orange bæs í Byko og svamp pensil.

Bæsaði stólinn með hjálp Nikulásar, hann var annað hvort rífa niður allan klósettpappírinn og henda í klósettið eða inní skápnum undir vaskinum að opna allar ilmvatnsprufur sem eru þar í körfu *andarp*

Notaði kvöldið/nóttina á undan til að pæla í útfærslu, litum og munstri, mældi og skar út skrapp pappír. Einnig er hægt að nota veggfóður, gamal eða nýtt en ég var hrifnari af skrapp pappírnum.

Búin að líma skrapp pappírinn með föndurlími og betri helmingurinn minn spreyjaði stólinn með glæru lakki.

Ótrúlega ánægð með stólinn og hann á sko heldur betur eftir að nýtast vel á þessu heimili ! :)