Tátiljur

Þessa uppskrift keypti ég á Etsy/slippers, garnið heitir Novita frá Handprjón.

Risaeðluhúfa

Fyrsta heklið mitt !

Á öllu átti ég von á en að fara að hekla eða prjóna !!

Síðustu árin hef ég verið á kafi í útivist, verið virk í björgunarsveit og notað allan minn frítíma í að klifra eða ganga á fjöll.

En svo fæddist litla gullið okkar og þá breyttist lífið okkar gjörsamlega, þessi drengur er heldur betur búinn að færa okkur mikla gleði og hamingju.

Forsendur breyttust og við höfum mikið verið heima sem varð til þess að ég fór að hekla (eftir að ég fékk leið á mínu manískum þrifum og hálf tómum þvottavélum)

Mér fannst þetta alveg frábært að geta setið kyrr en samt verið á fullu... í höndunum :)

Gefur mér ofboðslega mikið að hekla og mikla ró.

Þetta er s.s risaeðluhúfa sem ég keypti á Etsy/dinosaur hat, ég sat heilu kvöldin með Youtube fyrir framan mig að æfa mig í að gera loftlykkjur og fastapinna, einnig reyndi ég að skoða fleiri video þar inni og svo var bara að klóra sig áfram.

Í dag þegar ég skoða húfuna þá finnst mér kambarnir allt of stórir, í húfunum sem ég heklaði um daginn þá fyllti ég kambana og hafði þá töluvert minni.

Garnið er Abuelita (merino worsted) frá Handprjón og fyrirsætan er Nikulás, litla gullið mitt :)

Afmælisveisla Kára - 6 ára

Kakan neðst er regnbogakaka en ég klikkaði á því að taka mynd eftir að búið var að skera fyrstu sneiðina, þetta eru 6 botnar sem ég setti saman, ansi há og með rjómaostakremi utaná.

Ég man ekki alveg hvaðan ég fékk uppskriftina en hún fylgir hér fyrir neðan, á miðju myndinni eru brownies með geim myndum sem ég fann á netinu, prentaði út, gataði og límdi tanstöngla aftan á. Myndin efst segir sig sjálft.

Regnbogakaka

2 og 1/4 bolli hveiti
1 tsk lyftiduft
1/2 tsk salt
1 og 1/4 bolli mjólk
4 stór egg
1 bolli sykur
2 tsk  rifinn sítrónubörkur
8 matskeiðar mjúkt smjör
1/2 teskeið sítrónudropar
Matarlitur

Aðferð

Hitið ofninn í 180 gráður.

Berið smjör inn í tvö kringlótt meðalstór kökumót. Sigtið saman hveiti, lyftiduft og salt. Hrærið saman eggjahvítur og mjólk í annarri skál. Hrærið saman smjör, sítrónubörk og sykur í hrærivél á fullum hraða í um 3 mínútur eða þar til blandan er orðin létt og loftkennd. Bætið sítrónudropunum samanvið. Hrærið hveitiblönduna smátt og smátt saman við þetta til skiptis við eggja- og mjólkurblönduna. Hrærið blönduna á meðalhraða í um 2 mínútur eða þar til deigið er orðið vel blandað.

Ákveðið hvað á að hafa mörg lög af litum. Skiptið deiginu upp í hluta eftir því hvað þið viljið hafa marga liti. Litið hvern hluta af deigi með sínum lit. Ég nota matarliti frá Wilton, en þeir fást í bökunardeildinni í Húsasmiðjunni/Blómaval. Það eru litir úr geli og þarf mjög lítið af þeim til að ná fram sterkum lit. Ef þið ætlið að notast við Wilton matarlit byrjið þá á því að dýfa tannstöngli ofan í matarlitinn og hræra svo tannstönglinum samanvið deigið. Endurtakið ef þið viljið fá sterkari lit. Bakið hverja litaða deigblöndu fyrir sig í ca. 20 mínútur. Leyfið kökunni að kólna. Til þess að kakan haldi raka er best að setja plastfilmu yfir kökuna um leið og hún hefur kólnað nægilega vel og geyma á  köldum stað. 

Frostingkrem 

600 gr rjómaostur
15 tsk mjúkt smjör
6 tsk vanilludropar
6 bollar flórsykur

Hrærið rjómaostinn þar til hann er orðinn mjúkur, bætið því næst við smjörinu og vanilludropunum. Bætið flórsykrinum smám saman við blönduna og hrærið vel.

Að setja kökuna saman

Leggið fjólubláa kökubotninn á kökudisk. Smyrjið þunnu lagi af apríkósusultu á kökubotninn og smyrjið svo þunnu lagi af stífþeyttum rjóma þar ofan á. Leggið bláa kökubotninn ofan á. Smyrjið þann botn aftur með apríkósusultu og svo þar yfir með frostingkreminu. Endurtakið leikinn með þá kökubotna sem eftir eru og skiptist á að smyrja með þeyttum rjóma og frostingkremi á milli laga. Til þess að kakan tolli betur saman er gott að kæla hana inn á milli. Þegar öll lögin eru komin má smyrja kökuna að utan með örþunnu lagi af frostingkremi og setjið í kæli í 20 mínútur. Að lokum má taka kökuna úr kæli og smyrja hana að utan með þykkara lagi af frosting kremi og dreifa kókosmjöli yfir kökuna. 

Matarboð með Creditinfo stelpunum mínum

Aðalréttur

Pönnusteiktar Andarbringur með ferskri salvíu, appelsínusósa með ávöxtum, sætar kartöflur m/kúmen, fersku basil og gráðosti og salat með perum og parmaskinku.

Eftirréttur

Strawberry and Lemon Curd Trifle, uppskrift frá Stephanie hjá Joy of Baking

Vanillu hindberjabollakökur

Þessa uppskrift fann ég í einhverju Gestgjafa blaði, ein af mínum uppáhalds, svo ferskar og góðar.

Hér er uppskriftin:

100 gr smjör, mjúkt
140 gr sykur
2 egg, stór
240 gr hveiti
1 tsk lyftiduft
1/4 tsk salt
1 jógúrt (með eða án bragðefna)
1 tsk vanilludropar

250 gr jarðarber eða önnur ber
3 msk pistasíur eða hesilhnetur
2-3 msk sykur

Hitið ofninn í 180°

Hrærið saman smjör og sykur þar til blandan er létt og loftkennd. Bætið eggjum út í, einu í einu, og hrærið mjög vel saman.
Sigtið hveiti og lyftiduft saman og bætið út í, ásamt jógúrt og vanilludropum. Blandið öllu saman með sleikju. Setjið deigið í múffuform og stingið berjum í deigið og sáldrið sykri og hnetum ofan á. Bakið kökurnar í miðjum ofni í 15 mín eða þangað til þær eru gullinbrúnar. Múffurnar eru bestar nýbakaðar en má gjarnan frysta :)

Bollakökur fyrir afmæli Arons Fannars

Gulrótarbollakökur og Súkkulaði hindberja bollakökur með sykurmassaskreytingu sem ég man ekki lengur hvað átti að vera :)

Skvísu-Matarboð

Forréttur

Laxatartar með Kóríander og tobikko hrognum.

Milliréttur

Grillaður humar í basil-hvítlaus-olíu-smjöri

Aðalréttur

Hágæða hreindýrafillet, villibráðasósa, grillaðir portobello sveppir, sætar kartöflur m/kúmen, fersku basil og gráðosti og salat með perum og parmaskinku.

Eftirréttur

Heimabakaðar súkkulaði-hindberja bollakökur með hindberjkremi